ချက်ချင်းထုတ်ပြန်ရန်
ဇူလိုင် ၂၂၊ ၂၀၂၀
ကိုဗစ်–၁၉ အတွက် အမေရိကန်အကူအညီဖြင့် သန်းနှင့်ချီသောမြန်မာပြည်သူများအကျိုးရှိ
ရန်ကုန်။ ။ အမေရိကန်ပြည်ထောင်စု ကျန်းမာရေးနှင့်လူသားချင်းစာနာမှုအကူအညီကတစ်ဆင့် သန်းနှင့်ချီသော မြန်မာပြည်သူများအနေဖြင့် ကိုဗစ်–၁၉ ကူးစက်မှုကို လျှော့ချနိုင် သို့မဟုတ် ကာကွယ် တားဆီးနိုင်ခဲ့ပါသည်။ ကိုဗစ်–၁၉ ကပ်ဘေးကာလအတွင်း မြန်မာနိုင်ငံသို့ပေးအပ်သည့် အမေရိကန် အကူအညီများသည် မြန်မာပြည်သူများ၏ ကျန်းမာရေးကဏ္ဍတိုးတက်မှုအတွက် အမေရိကန် ပြည်ထောင်စု၏ ရေရှည်ကတိကဝတ်ကို ထင်ဟပ်ပါသည်။ မြန်မာနိုင်ငံ၏ ကိုဗစ်–၁၉တုံ့ပြန်ဆောင်ရွက်ရေးနှစ်နိုင်ငံအပြန်အလှန်အများဆုံးပေးအပ်လှူဒါန်းသည့်နိုင်ငံများတွင်အမေရိကန်ပြည်ထောင်စုသည်လည်းတစ်နိုင်ငံအပါအဝင်ဖြစ်ပါသည်။
“အမေရိကန်ရောဂါထိန်းချုပ်ရေးနဲ့ တားဆီးကာကွယ်ရေးဗဟို (စီဒီစီ) ကတစ်ဆင့် အမေရိကန်အစိုးရ အကူအညီ နောက်ထပ် ဒေါ်လာ ၁.၉၅ သန်း ပေးအပ်မှာဖြစ်တဲ့အကြောင်း ဒီကနေ့ ကျွန်တော် ဂုဏ်ယူဝမ်းမြောက်စွာ ပြောကြားလိုပါတယ်။ အခုပေးအပ်တာနဲ့ဆိုရင် ကိုဗစ်–၁၉ တုံ့ပြန် ဆောင်ရွက်ရေးအတွက် ၂၀၂၀၊ ဖေဖော်ဝါလ ကစပြီး အမေရိကန်အစိုးရကနေ မြန်မာနိုင်ငံကို ပေးအပ်ခဲ့တာ စုစုပေါင်း ဒေါ်လာ ၁၈.၅ သန်း ရှိသွားပြီ ဖြစ်ပါတယ်” ဟု သံရုံးယာယီတာဝန်ခံ ဂျော့ချ်ဆစ်ဘလီက ပြောပါသည်။ “ဒီအကူအညီဟာ မြန်မာနိုင်ငံကျန်းမာရေးကဏ္ဍအတွက် ထားရှိထားတဲ့ ရေရှည်ကတိကဝတ်ရဲ့ အစိတ်အပိုင်းတစ်ရပ်ဖြစ်ပါတယ်” ဟု၎င်းကထပ်မံဖြည့်စွက်ပြောကြားပါသည်။
ရန်ပုံငွေအသစ်သည် အမေရိကန်နိုင်ငံတကာဖွံ့ဖြိုးရေးအေဂျင်စီခေါ် ယူအက်စ်အေ့ဒ်၏ ဒေါ်လာ ၁၄.၃ သန်းအပါအဝင် အမေရိကန်အစိုးရ၏ ကျန်းမာရေးနှင့် လူသားချင်းစာနာမှုရန်ပုံငွေ ဒေါ်လာ ၁၆.၅ သန်းအပေါ် ထပ်မံအားဖြည့်ခြင်းဖြစ်ကာ အထူးသဖြင့် ကိုဗစ်–၁၉ကပ်ဘေးကာလအတွင်းမြန်မာပြည်သူများအတွက်ဖြစ်ပါသည်။
“ကိုဗစ်–၁၉ တုံ့ပြန်ဆောင်ရွက်ရေး အမေရိကန်အကူအညီတွေကနေပြီး သန်းနဲ့ချီတဲ့ မြန်မာပြည်သူတွေ အတွက် တိုက်ရိုက်အကျိုးရှိစေပါတယ်” “ဒီအကူအညီတွေကနေပြီး IDP စခန်းတွေက ချို့တဲ့သူတွေနဲ့ ထိခိုက်ခံစားရ လွယ်တဲ့သူတွေ၊ ပြည်တွင်းနေရပ်စွန့်ခွာနေရသူတွေ၊ တိုင်းရင်းသားပြည်သူတွေ၊ ပဋိပက္ခ ဘေးသင့်အရပ်က ပြည်သူတွေအတွက် ကျန်းမာရေးဝန်ဆောင်မှုတွေ၊ ရေနဲ့သန့်ရှင်းရေး အထောက် အကူပြုပစ္စည်းတွေ၊ လူမှုရေးနဲ့ ကာကွယ်စောင့်ရှောက်ရေးဝန်ဆောင်မှုတွေ ရောက်ရှိစေဖို့ အထူး အာရုံစိုက်ပါတယ်” ဟု ယူအက်စ်အေ့ဒ်၏ ဌာနညွှန်ကြားရေးမှူးဖြစ်သူ ထရီဆာမက်ဂီ ကပြောပါသည်။
ယူအက်စ်အေ့ဒ်၏ အကူအညီများတွင် အောက်ပါအစီအစဉ်များပါဝင်ပါသည်။
- ကူးစက်မှုခြေရာခံခြင်းနှင့် အဖျားတိုင်းခြင်းအပါအဝင် ရပ်ရွာလူထုအခြေပြု စောင့်ကြပ်ကြည့်ရှုမှု အစီအစဉ်က တစ်ဆင့် ကျန်းမာရေးဌာနများနှင့် ရပ်ရွာလူထုအခြေပြုသော သီးသန့်ထား စောင့်ကြည့်သည့် စင်တာ ၃၅၀ တွင် လူပေါင်း ၁၃၅,၂၇၅ ကိုစောင့်ကြပ်ကြည့်ရှုပေးနိုင်ခဲ့သော အလှူရှင်များစွာဖြင့် ဆောင်ရွက်နေသည့် ကျန်းမာရေးစောင့်ရှောက်မှု လက်လှမ်းမီရရှိရေး ရန်ပုံငွေအဖွဲ့ကတစ်ဆင့်ပေးအပ်ခဲ့သော ဒေါ်လာ ၆.၅ သန်း ယူအက်စ်အေ့ဒ် အကူအညီ။
- မတ်လအတွင်း ကမ္ဘာ့ကျန်းမာရေးအဖွဲ့သို့ အမေရိကန်နိုင်ငံတကာဖွံ့ဖြိုးရေး အေဂျင်စီက အကူအညီပေးမှုနှင့်အတူ မြန်မာနိုင်ငံ၏ အမျိုးသားကျန်းမာရေးဓာတ်ခွဲမှုဆိုင်ရာဌာနက ပထမဆုံး နမူနာ ၃,၀၀၀ ကိုစစ်ဆေးနိုင်ခဲ့ပြီး ကိုဗစ်–၁၉ မသင်္ကာသူ ၁၉ ဦးကိုခြေရာခံနိုင်ခဲ့ကာ အတည်ပြုခြင်း၊ ထိတွေ့မှု ဖော်ထုတ်ခြင်းတို့ဆောင်ရွက်နိုင်ခဲ့သည်။ ကျန်းမာရေး ဝန်ထမ်းများကို ကူးစက်မှုမှကာကွယ်ပေး၍ ၎င်းတို့ကိုယ်တိုင်နှင့် လူနာများကို ကာကွယ် ပေးရေးအတွက် သတင်းအချက်အလက်များနှင့် အရင်းအမြစ်များ ပံ့ပိုးကာ အရေးကြီးသော ဝန်ဆောင်မှုများ ဆက်လက်ပေးအပ်နိုင်ရေးအတွက် ကမ္ဘာ့ကျန်းမာရေးအဖွဲ့က တစ်ဆင့် ပေးအပ်သော အမေရိကန် ရန်ပုံငွေဖြင့် ကျန်းမာရေးနှင့် အားကစားဝန်ကြီးဌာနကိုလည်း အကူအညီပေးနေပါသည်။
- ယူအက်စ်အေ့ဒ်က ယူနီဆက်ဖ်သို့ ပေးအပ်သောအကူအညီနှင့်အတူ ယူနီဆက်ဖ်နှင့် ကျန်းမာရေးနှင့် အားကစားဝန်ကြီးဌာနတို့၏ ပူးပေါင်းဆောင်ရွက်မှုကတစ်ဆင့် ကိုဗစ်–၁၉ နှင့်ပတ်သက်သော တိကျသည့် သတင်းအချက်အလက်များကို လူငါးသန်းကျော်ရရှိခဲ့သည်။ ယူအက်စ်အေ့ဒ်၏ အကူအညီသည် ကချင်ပြည်နယ်၊ ရှမ်းပြည်နယ် အရှေ့ပိုင်းနှင့် မြောက်ပိုင်းရှိ ပဋိပက္ခဘေးသင့်ရာ နေရာများမှ ကျန်းမာရေးဌာန ၁၉၅ ခုရှိကျန်းမာရေး လုပ်သားများအတွက် N95 နှာခေါင်းစည်း ၂၉,၉၉၅ ခုကိုလည်း လှူဒါန်းပေးနိုင်ခဲ့သည်။ ယင်းသို့ လှူဒါန်းမှု၏ ၆၀ ရာခိုင်နှုန်းကျော်မှာ ပဋိပက္ခ ဘေးသင့်ရာနေရာများတွင်ဆောင်ရွက်နေကြသော အစိုးရ မဟုတ်သည့် တိုင်းရင်းသား အဖွဲ့အစည်းများနှင့် လူထုအခြေပြု ကျန်းမာရေးအဖွဲ့အစည်းများကို ပေးအပ်ခဲ့ခြင်းဖြစ်သည်။
- ဇွန်လအတွင်းစတင်ခဲ့သော တစ်နိုင်ငံလုံးအတိုင်းအတာနှင့်ဖော်ဆောင်သည့် “ပူးပေါင်းကာကွယ်” ကိုဗစ်–၁၉ အသိပညာပေးလှုပ်ရှားမှုကတစ်ဆင့် ကိုဗစ်–၁၉ ကူးစက်မှုမှ မည်သို့ တားဆီးကာကွယ်ကြရမည့်အကြောင်း သတင်းအချက်အလက်များကို ပထမသီတင်းပတ် နှစ်ပတ်အတွင်း လူပေါင်း ၁.၉ သန်း ကျော် ရရှိခဲ့သည်။ မြန်မာနိုင်ငံအတွင်း လူမှုအသိုက်အဝန်းများထံရောက်ရှိစေရေးအတွက် “ပူးပေါင်းကာကွယ်” အစီအစဉ်တွင် ဘာသာစကားခြောက်မျိုး အသုံးပြုခဲ့ကြသည်။ ဤလုပ်ဆောင်မှုကို ယူအက်စ်အေ့ဒ်၏ Breakthrough Action အစီအစဉ်ကတစ်ဆင့် မြန်မာနိုင်ငံအတွင်း ဆောင်ရွက်နေသော မိတ်ဖက်အဖွဲ့အစည်းဖြစ်သည့် Save the Children က ကူညီပေးခဲ့သည်။
“ကျန်းမာရေးနဲ့အားကစားဝန်ကြီးဌာနရဲ့ ကူးစက်ရောဂါပျံ့ပွားခြင်းနဲ့ ကာကွယ်ခြင်းဆိုင်ရာ ကွင်းဆင်းရှာဖွေထိန်းချုပ်ခြင်း အစီအစဉ်နဲ့ ရောဂါစောင့်ကြည်တာနဲ့ ခြေရာခံတာတွေမှာ ကျန်းမာရေး လုပ်သားတွေရဲ့ လုပ်ဆောင်မှုတွေပိုပြီး အားကောင်းလာစေဖို့အတွက် စီဒီစီ ကဆက်ပြီး ကူညီသွားမှာ ဖြစ်ပါတယ်။ ဒီကြိုးပမ်းအားထုတ်မှုတွေဟာ မြန်မာပြည်သူတွေရဲ့ ကျန်းမာရေးကဏ္ဍတိုးတက်ဖို့နဲ့ ကောင်းကျိုးသုခတွေအတွက် အကူအညီပေးဖို့ စီဒီစီက ဆက်လက် ဆောင်ရွက်လျက်ရှိတဲ့ လုပ်ငန်းတွေကို ထပ်ပြီးအားဖြည့်တာဖြစ်ပါတယ်” ဟု မြန်မာနိုင်ငံ၏ ကိုဗစ်–၁၉ တုံ့ပြန်ဆောင်ရွက်မှု အတွက်ပေးအပ်သည့် ဒေါ်လာ ၁.၉၅သန်းရန်ပုံငွေအသစ်နှင်စပ်လျဉ်း၍အမေရိကန်ရောဂါထိန်းချုပ်ရေးနှင့်တားဆီးကာကွယ်ရေးဗဟို၏ဌာနေညွှန်ကြားရေးမှူးဒေါက်တာမီတရှ်ဒေဆိုင်းကပြောပါသည်။
သံရုံးယာယီတာဝန်ခံ ပြောကြားသော မှတ်ချက်စကားများ အပြည့်အစုံကို အင်္ဂလိပ်ဘာသာဖြင့် (https://go.usa.gov/xfkfy) မြန်မာဘာသာဖြင့် (https://go.usa.gov/xfkGB)၊ ယူအက်စ်အေ့ဒ် ဌာနေညွှန်ကြားရေးမှူး ပြောကြားသော မှတ်ချက်စကားများ အပြည့်အစုံ အင်္ဂလိပ်ဘာသာဖြင့် (https://go.usa.gov/xfkGY) မြန်မာဘာသာဖြင့် (https://go.usa.gov/xfkGj) နှင့် စီဒီစီဌာနေညွှန်ကြားရေးမှူး ပြောကြားသော မှတ်ချက်စကားများ အပြည့်အစုံကို အင်္ဂလိပ်ဘာသာဖြင့် (https://go.usa.gov/xfkGm) မြန်မာဘာသာဖြင့် (https://go.usa.gov/xfkGV) တွင်ကြည့်နိုင်ပါသည်။ အမေရိကန်အစိုးရ အကူအညီနှင့် ပတ်သက်သောအချက်အလက်များကို ပိုမိုပြည့်စုံစွာ သိရှိနိုင်ရန်အတွက် အင်္ဂလိပ်ဘာသာဖြင့် (https://go.usa.gov/xfk79), မြန်မာဘာသာဖြင့် (https://go.usa.gov/xfk7P) တွင်ကြည့်နိုင်ပါသည်။
ယူအက်စ်အေ့ဒ်နှင့် စီဒီစီတို့၏ ကမ္ဘာလုံးဆိုင်ရာကိုဗစ်–၁၉ တုံ့ပြန်မှုနှင့်ပတ်သက်၍ ပိုမိုသိရှိလိုပါက https://www.usaid.gov/coronavirus-covid-19 နှင့် https://www.cdc.gov/coronavirus/2019-ncov/global-covid-19/global-response.html တွင် ကြည့်ရှုနိုင်ပါသည်။
### ပြီး ###
