မြန်မာနိုင်ငံအတွင်း အာဏာသိမ်းမှုအပေါ် တုံ့ပြန်ရာတွင် ဘိုင်ဒင်–ဟာရစ် အစိုးရအဖွဲ့ အရေးယူဆောင်ရွက်မှု
ဖေဖော်ဝါရီ ၁၁၊ ၂၀၂၁
သမ္မတ ဘိုင်ဒင်သည် မြန်မာနိုင်ငံအတွင်း စစ်အာဏာသိမ်းမှုနှင့် သမ္မတဦးဝင်းမြင့်၊ နိုင်ငံတော်၏ အတိုင်ပင်ခံပုဂ္ဂိုလ် အောင်ဆန်းစုကြည်နှင့် အခြား အရပ်သားတာဝန်ရှိပုဂ္ဂိုလ်များနှင့် လူ့အခွင့်အရေး ခုခံကာကွယ်သူများ၊ သတင်းသမားများ၊ အရပ်ဘက်လူမှု အဖွဲ့အစည်း ခေါင်းဆောင်များအား မတရားဖမ်းဆီးထိန်းသိမ်းထားခြင်းအပေါ် တုံ့ပြန်ရာတွင် ထူးခြားအရေးပါသော အဆင့်များ ယနေ့ဆောင်ရွက်လျက် ရှိပါသည်။
ငြိမ်းချမ်းစွာ ဆန္ဒပြခြင်းကတစ်ဆင့် ဒီမိုကရေစီကို ထောက်ခံပံ့ပိုးမှုသည့်အကြောင်း မြန်မာပြည်သူလူထုကထပ်လောင်းအတည်နေသကဲ့သို့ မိမိတို့ကလည်း မဟာမိတ်များ၊ မိတ်ဖက်များနှင့် နိုင်ငံတကာ အဖွဲ့အစည်းများနှင့်အတူ မြန်မာပြည်သူလူထုနှင့်အတူ ရပ်တည်သွားမည်ဖြစ်ပါသည်။
=====================
ဖေဖော်ဝါရီလ ၁ ရက်နေ့က အာဏာသိမ်းခြင်းအတွက် တာဝန်ရှိသူများကို တာဝန်ယူမှု၊ တာဝန်ခံမှုရှိ စေရန်နှင့် မြန်မာပြည်သူလူထု၏ ဒီမိုကရက်တစ်ရည်မှန်းချက်အတွက် အမေရိကန်ပြည်ထောင်စု၏ ထောက်ခံအားပေးမှုကို ထပ်လောင်းအတည်ပြုရန်အတွက် ခိုင်မာသည့် အရေးယူဆောင်ရွက်မှုများကို သမ္မတ ဘိုင်ဒင်က ယနေ့ဆောင်ရွက်လျက် ရှိပါသည်။
ဒီမိုကရေစီစနစ်တစ်ရပ်တွင် အင်အားကိုအသုံးပြု၍ နိုင်ငံသားတို့၏ဆန္ဒကိုပယ်ဖျက်ရန် သို့မဟုတ် အများယုံကြည်လက်ခံသောရွေးကောက်ပွဲရလဒ်ကို ပယ်ဖျက်ရန် မလုပ်ဆောင်သင့်ပါ။ မြန်မာနိုင်ငံသားတို့သည် ရွေးကောက်ပွဲများကျင်းပနိုင်ရေး၊ အရပ်သားအုပ်ချုပ်မှုစနစ်ထူထောင်နိုင်ရေးနှင့် ငြိမ်းချမ်းစွာအာဏာလွှဲပြောင်းနိုင်ရေးအတွက် ဆယ်စုနှစ်တစ်ခုနီးပါးအတွင်း တစ်စိုက်မတ်မတ် ကြိုးပမ်းအားထုတ်လာခဲ့ကြပါသည်။ ဤဖြစ်ပေါ်တိုးတက်လာမှုတို့ကို တန်ဖိုးထားလေးစားသင့်ပါသည်။
ယနေ့ချမှတ်သည့် အရေးယူပိတ်ဆို့မှုများသည် အမြဲတမ်းဖြစ်စရာမလိုပါ။ မြန်မာစစ်တပ်အနေဖြင့် ဒီမိုကရေစီနည်းကျ ရွေးကောက်တင်မြှောက်ထားသော အစိုးရထံ အာဏာ ချက်ချင်းပြန်လည် လွှဲပြောင်းပေးရပါမည်၊ နိုင်ငံတော်အရေးပေါ်အခြေအနေကို အဆုံးသတ်ရပါမည်၊ မတရားဖမ်းဆီး ထိန်းသိမ်းထားသူအားလုံးကို လွှတ်ပေးရပါမည်၊ ငြိမ်းချမ်းစွာ ဆန္ဒထုတ်ဖော်သူများကို အကြမ်းဖက်ခြင်း လုံးဝမပြုလုပ်သင့်ပါ။ မြန်မာနိုင်ငံ၏ နိုဝင်ဘာလ ၈ ရက်၊ ၂၀၂၀ ခုနှစ် ရွေးကောက်ပွဲ၏ ရလဒ်များကို လေးစားရမည်ဖြစ်ပြီး လွှတ်တော်ကို အစောဆုံး အခွင့်အရေးဖြင့် ကျင်းပသင့်ပါသည်။
မြန်မာနိုင်ငံ စစ်တပ်၏ လုပ်ဆောင်ချက်များကို ကန့်ကွက်ရှုတ်ချသကဲ့သို့ အမေရိကန်ပြည်ထောင်စုသည် မိမိတို့၏ မဟာမိတ်များ၊ မိတ်ဖက်များ၊ နိုင်ငံတကာအဖွဲ့အစည်းများနှင့်အတူ ဆက်လက်လက်တွဲ ဆောင်ရွက်သွားမည် ဖြစ်ပြီး ဒီမိုကရေစီကို ချက်ချင်း ပြန်လည်အသက်ဝင်စေရန်ပေးရန် တောင်းဆိုပါသည်။ ဤအာဏာသိမ်းခြင်းသည် နိုင်ငံ၏ ဒီမိုကရေစီ အကူးအပြောင်းအပေါ်တွင် တိုက်ရိုက် ထိုးနှက်တိုက်ခိုက်အဖြစ် မိမိတို့မြင်ပါသည်။ ယနေ့နှင့် လာမည့်နေ့များတွင် ညွှန်ကြားချက်များနှင့် အရေးယူဆောင်ရွက်မှုများကို သမ္မတဘိုင်ဒင်က ထုတ်ပြန်သွားမည် ဖြစ်ပါသည်။
အာဏာသိမ်းမှုတွင် ပါဝင်သူများကို တာဝန်ယူမှု၊ တာဝန်ခံမှုရှိစေခြင်း
အမေရိကန်ပြည်ထောင်စုသည် မြန်မာနိုင်ငံ၏ မကြာသေးမီက ပြုလုပ်ခဲ့သော ရွေးကောက်ပွဲများ၏ ရလဒ်ကို ပြောင်းလဲရန် ကြိုးပမ်းအားထုတ်မှု သို့မဟုတ် နိုင်ငံ၏ ဒီမိုကရေစီ အကူးအပြောင်းကို ကြန့်ကြာစေမှုကို ဆန့်ကျင်ကြောင်းနှင့် ဤအရေးကြီးသည့် အချိန်အခါ၌ မြန်မာပြည်သူများနှင့်အတူ ရပ်တည်ရန် ပျက်ကွက်သူများအတွက် အကျိုးဆက်များ ရှိလာမည်ဖြစ်ကြောင်းကို အာဏာသိမ်းကြောင်းသိရှိရပြီးနောက် အစိုးရအဖွဲ့က ချက်ချင်း ရှင်းလင်းစွာ ထုတ်ပြန်ခဲ့ပါသည်။
စစ်တပ်နှင့် လူပုဂ္ဂိုလ်အဖွဲ့အစည်းများအပေါ် အရေးယူပိတ်ဆို့မှု အသစ်များ ချမှတ်ခြင်း – ယနေ့ သမ္မတဘိုင်ဒင်သည် မြန်မာစစ်တပ်နှင့်စစ်တပ်ခေါင်းဆောင်များ၊ ၎င်းတို့၏စီးပွားရေး အကျိုးခံစားသူများကို အဓိကပစ်မှတ်ထားလျက် အရေးယူပိတ်ဆို့မှု စနစ်သစ်တစ်ရပ်ကို စတင်ခဲ့ပါသည်။ အမေရိကန် ဘဏ္ဍာရေးဌာနသည် အာဏာသိမ်းခြင်းအတွက် တာဝန်ရှိသော စစ်တပ် ယန္တရားများနှင့် ဆက်နွှယ်နေသည့် တစ်သီးပုဂ္ဂလ ၁၀ ခုနှင့် အဖွဲ့အစည်း သုံးခုကို သတ်မှတ်ခဲ့ပါသည်။ အဆိုပါ တစ်သီးပုဂ္ဂလများတွင် မြန်မာနိုင်ငံ တပ်မတော် ကာကွယ်ရေးဦးစီးချုပ် မင်းအောင်လှိုင်၊ မြန်မာနိုင်ငံ တပ်မတော် ဒုတိယကာကွယ်ရေးဦးစီးချုပ် စိုးဝင်းနှင့် နိုင်ငံတော်စီမံအုပ်ချုပ်ရေးကောင်စီ အဖွဲ့ဝင်လေးဦး အပါအဝင် အမျိုးသား ကာကွယ်ရေးနှင့် လုံခြုံရေးကောင်စီ အဖွဲ့ဝင် ခြောက်ဦး ပါဝင်ပါသည်။ သမ္မတဘိုင်ဒင်က လက်မှတ်ရေးထိုးထားသော သမ္မတအမိန့်အသစ်အရ ဘဏ္ဍာရေးသည် အဆိုပါပုဂ္ဂိုလ်များ၏အိမ်ထောင်ဖက်များ၊ အရွယ်ရောက်သားသမီးများကိုလည်း ပစ်မှတ်ထားနိုင် ပါသည်။
မြန်မာ့တပ်မတော်က ပိုင်ဆိုင်သော သို့မဟုတ် ထိန်းချုပ်ထားသော ကော်ပိုရေးရှင်းကြီး၏ လက်အောက်ခံ ကုမ္ပဏီများကို အပြည့်အဝ ပိုင်ဆိုင်ထားသည့် Myanmar Ruby Enterprise နှင့် Myanmar Imperial Jade Co., LTD. အပါအဝင် အဖွဲ့အစည်းသုံးခုကိုလည်း သတ်မှတ်ခဲ့ပါသည်။
ပို့ကုန် ကန့်သတ်ချက်များ ချက်ချင်း ချမှတ်ခြင်း – ထို့ပြင်ကူးသန်းရောင်းဝယ်ရေး ဝန်ကြီးဌာနကလည်း မြန်မာ့တပ်မတော်နှင့် မကြာသေးခင်က အာဏာသိမ်းခြင်းနှင့် ဆက်စပ်သည့် အခြား အဖွဲ့အစည်းများ၏ ကုန်ပစ္စည်းများ တင်ပို့မှုကို ကန့်သတ်ရန် ချက်ချင်း အရေးယူဆောင်ရွက်လျက် ရှိပါသည်။ မကြာသေးခင်က လှုပ်ရှားဆောင်ရွက်မှုများကို တုံ့ပြန်သည့်အနေဖြင့် မြန်မာနိုင်ငံ၏ ကာကွယ်ရေး ဝန်ကြီးဌာန၊ ပြည်ထဲရေးဝန်ကြီးဌာန၊ တပ်မတော်တပ်ဖွဲ့နှင့် လုံခြုံရေးတပ်ဖွဲ့များအပေါ်တွင် ပို့ကုန် ကန့်သတ်ချက် များစွာကို ချက်ချင်း ချမှတ်နေပါသည်။ ဒီမိုကရက်တစ်စံနှုန်းများနှင့် အင်စတီကျူးရှင်းများကို တစ်စစီချိုးဖျက်ရာတွင် ပါဝင်သည့် အဖွဲ့အစည်းများအနေနှင့် အမေရိကန် နည်းပညာများ မရရှိစေရန် မြန်မာ့တပ်မတော်အပေါ် နောက်ထပ် တင်ပို့မှု ကန့်သတ်ချက်များ ပြင်ဆင်မွမ်းမံမှု၍ ဆက်လက်ချမှတ်သွားနိုင်အတွက် အကဲဖြတ် ရေးဆွဲသွားမည် ဖြစ်ပါသည်။
အမေရိကန်ပြည်ထောင်စုအတွင်းရှိ ပိုင်ဆိုင်မှုပစ္စည်းများကို ထိန်းချုပ်ကန့်သတ်ခြင်း – အမေရိကန်ပြည်ထောင်စုရှိ မြန်မာအစိုးရ၏ ရန်ပုံငွေ ဒေါ်လာ တစ် ဘီလျံကျော်အား စစ်ဗိုလ်ချုပ်များ တရားနည်းလမ်းမကျ ရယူမှုမှ တားဆီးဟန့်တားသွားနိုင်ရန်အတွက် အမေရိကန်အစိုးရက ဆောင်ရွက်နေပါသည်။ အမေရိကန် ပြည်ထောင်စုသည် မြန်မာနိုင်ငံ၏ ဒီမိုကရေစီဆီသို့ လျှောက်လှမ်းသည့် တိုးတက်မှုအခြေအနေများအပေါ် မူတည်၍ လွန်ခဲ့သည့် မြန်မာနိုင်ငံအပေါ် တားဆီးပိတ်ဆို့မှုများကို ဆယ်စုနှစ်ကျော်အတွင်းက ဖယ်ရှားပေးခဲ့ပြီး ယနေ့ အရေးယူ ပိတ်ဆို့မှုများသည် ဒီမိုကရေစီဆီသို့လျှောက်လှမ်းနေသည့် မြန်မာပြည်သူများ၏ သဘောဆန္ဒကို ကန့်လန့်ခံရန် ကြိုးပမ်းသူများကို ဆန့်ကျင်သည့် ဒဏ်ခတ်သည့် ဆောင်ရွက်ချက်ကို ပံ့ပိုးပေးပါသည်။
မဟာမိတ်များ၊ မိတ်ဖက်များနှင့် စိတ်တူသဘောတူ အဖွဲ့အစည်းများနှင့်အတူ လုပ်ကိုင်ခြင်း
နိုင်ငံတကာ ပံ့ပိုးမှု တည်ဆောက်ခြင်း – အမေရိကန်ပြည်ထောင်စုအနေဖြင့် ဒီမိုကရေစီနှင့် တရားဥပဒေ စိုးမိုးရေးကို ပြန်လည်အသက်ဝင်ရေးကို အားပေးကူညီရန်နှင့် မြန်မာနိုင်ငံ၏ ဒီမိုကရေစီ အသွင်ကူးပြောင်းရင်းကို ကျွမ်းထိုးမှောက်ခုံဖြစ်စေသည့် တာဝန်ရှိသူများအနေဖြင့် တာဝန်ခံမှု၊ တာဝန်ယူမှုရှိစေရန်အတွက် ဒေသတွင်းနှင့် ကမ္ဘာအနှံ့ မိမိတို့၏ မိတ်ဖက်များနှင့်အတူ ဆက်လက် လက်တွဲဆောင်ရွက်သွားမည် ဖြစ်ပါသည်။
အဆင့်အမျိုးမျိုးရှိ မဟာမိတ်ဖက်များ၊ မိတ်ဖက်များနှင့် စိတ်တူသဘောတူ အဖွဲ့အစည်းများနှင့်အတူ အမေရိကန်ပြည်ထောင်စု၏ အနီးကပ် ညှိနှိုင်းဆောင်ရွက်မှုသည် မြန်မာပြည်သူများအပေါ် စော်ကားမှု အနေဖြင့် အာဏာသိမ်းခြင်းနှင့် ပတ်သက်၍ စဉ်ဆက်မပြတ် ခိုင်မာသည့် သတင်းစကားများ ထွက်ပေါ်စေပါသည်။ အမေရိကန်ပြည်ထောင်စုသည် ယခင်အပတ်ကလည်း ကုလသမဂ္ဂ လုံခြုံရေး ကောင်စီတွင် အတူတကွတွေ့ဆုံနိုင်ရန် ကူညီပေးနိုင်ခဲ့ပြီး မြန်မာနိုင်ငံ ဒီမိုကရေစီကို ထောက်ခံ အားပေးသော ခိုင်မာသည့် ထုတ်ပြန်ချက်တစ်ရပ်ကို ထုတ်ပြန်နိုင်ခဲ့ပါသည်။ ဖေဖော်ဝါရီလ ၁၂ ရက်တွင် မိမိတို့သည် တပ်မတော်အနေဖြင့် လူ့အခွင့်အရေး အလွဲသုံးစားမှုများကို အဆုံးသတ်ရန် လိုအပ်မှုကို အလေးထားပြောကြားနိုင်ရန်အတွက် ကုလသမဂ္ဂ လူ့အခွင့်အရေးကောင်စီ၏ အစည်းအဝေးကိုပါဝင် တက်ရောက်မည်ဖြစ်ပါသည်။ မြန်မာနိုင်ငံအကြောင်းနှင့်ပတ်သက်၍ သမ္မတ ဘိုင်ဒင်သည် ဝန်ကြီးချုပ် မိုဒီနှင့် သမ္မတရှီ အပါအဝင် ဒေသတွင်းရှိ ခေါင်းဆောင်များနှင့် တိုက်ရိုက် ပြောဆိုခဲ့ပါသည်။ မိမိတို့သည် စိတ်သဘောထားချင်းတိုက်ဆိုင်သည့် နိုင်ငံများနှင့် ဆက်လက် အနီးကပ် ဆက်သွယ်ဆောင်ရွက် နေမည်ဖြစ်ပြီး ဂျီ–ဆဲဗင်း၊ အာဆီယံ နှင့် မြန်မာနိုင်ငံ၏ အိမ်နီးချင်းများစွာတို့က မြန်မာ့တပ်မတော်၏ လုပ်ဆောင်ချက်များကို ပြင်းထန်စွာ ကန့်ကွက်ရှုတ်ချသည့် ထုတ်ပြန်ချက်များကိုလည်း ကြိုဆိုပါသည်။
မြန်မာပြည်သူလူထုကို ဦးစားပေးသတ်မှတ်ခြင်း
အမေရိကန် အထောက်အပံ့သည် မြန်မာပြည်သူများကို တိုက်ရိုက်ပံ့ပိုးမှုဖြစ်အောင် သေချာစွာစိစစ်ခြင်း – ထို့ပြင် သမ္မတ ပြောကြားခဲ့သည့်အတိုင်း အမေရိကန် ဖွံ့ဖြိုးရေးနှင့် နိုင်ငံခြား အထောက်အပံ့ပေးရေးအေဂျင်စီများဌာနများကတစ်ဆင့် မြန်မာအစိုးရအတွက် အကျိုးရှိစေသော အမေရိကန် အထောက်အပံ့များကို ထိန်းချုပ်ရပ်တန့်ထားပါသည်။ သို့သော် ကျန်းမာရေးစောင့်ရှောက်မှု၊ အရပ်ဘက် လူမှုအဖွဲ့အစည်းများနှင့် မြန်မာပြည်သူများအပေါ် တိုက်ရိုက် အကျိုးရှိစေသော အခြားသောသဏ္ဍများအတွက် မိမိတို့ ဆက်လက်ကူညီပံ့ပိုးပေးနေမည် ဖြစ်ပါသည်။ ရိုဟင်ဂျာနှင့် အခြားသော ထိခိုက်လွယ်ပြည်သူများအတွက် မိမိတို့ ဆက်လက်ကူညီပံ့ပိုးသွားမည် ဖြစ်ပါသည်။
ယနေ့ အရေးယူဆောင်ရွက်ချက်များ၏ တစ်စိတ်အပိုင်းအနေဖြင့် USAID သည် မြန်မာအစိုးရအတွက် အကျိုးရှိစေသော လုပ်ငန်းများမှ အထောက်အပံ့ အမေရိကန်ဒေါ်လာ ၄၂.၄ သန်းကို စီးပွားရေးမူဝါဒ ပြုပြင်ပြောင်းလဲမှုအတွက် ပံ့ပိုးခြင်းအပါအဝင် အရပ်ဘက်လူမှုအဖွဲ့အစည်းနှင့် ပုဂ္ဂလိက အခန်းကဏ္ဍကို ပံ့ပိုးပေးရေးနှင့် ပိုမိုခိုင်မာအားကောင်းစေရေး အစီအစဉ်များအတွက် ပြောင်းလဲ အသုံးချမည် ဖြစ်ပါသည်။
USAID သည် ဒီမိုကရက်တစ်စပေ့စ်ကို ဆက်လက်ထိန်းသိမ်းရန်၊ စားရေရိက္ခာဖူလုံရေးကို အားပေး မြှင့်တင်ရန်၊ လွတ်လပ်၍ အမှီအခိုကင်းသော မီဒီယာကို ပံ့ပိုးပေးရန်နှင့် ပဋိပက္ခဘေးဒဏ်ခံရသော ဒေသများတွင် ငြိမ်းချမ်းရေးနှင့် ပြန်လည်ရင်ကြားစေ့ရေးကို မြှင့်တင်ရန် အားထုတ်မှုများ အပါအဝင် မြန်မာပြည်သူလူထု၏ ကျန်းမာရေးကို ရေရည်အကျိုးပြု၍ တိုးတက်စေရေးအတွက် တိုက်ရိုက် အကျိုးကျေးဇူးများ ပံ့ပိုးပေးရေးနိုင်ရေးအတွက် နှစ်ဦးနှစ်ဖက်အကျိုးပြု အစီအစဉ်များတွင် အမေရိကန်ဒေါ်လာ ၆၉ သန်းခန့် ဆက်လက်ပံ့ပိုးသွားမည်ဖြစ်ပါသည်။
