ထုတ်ပြန်ချက်သဝဏ်လွှာ
အမေရိကန်နိုင်ငံခြားရေးဝန်ကြီး အန်တိုနီ ဂျေ ဘလင်ကင်
ဧပြီ ၈၊ ၂၀၂၁
မြန်မာနှစ်သစ်ကူး သင်္ကြန်အခါသမယတွင် မြန်မာပြည်သူများကောင်းခြင်းမင်္ဂလာများနှင့်ပြည့်စုံပါစေကြောင်း၊ မြန်မာပြည်သူများအတွက်လှိုက်လှိုက်လှဲလှဲအလေးထားပူပန်ရသည့်အကြောင်း အမေရိကန်ပြည်ထောင်စုကိုယ်စား မိမိပြောကြားလိုပါသည်။
သင်္ကြန်ဆိုသည်မှာ အဟောင်းတို့ကိုဆေးကြော၍ အသစ်တို့တဖန် ပြန်လည်စတင်မွေးဖွားသော အခါသမယဖြစ်သည်။ မြန်မာပြည်သူများအတွက် အဓွန့်ရှည်တည်တံ့သော ကောင်းခြင်းမင်္ဂလာများနှင့် ငြိမ်းချမ်းမှုများ နှစ်သစ်တွင်ဆောင်ကြဉ်းပေးလာပါစေကြောင်း ယခုကဲ့သို့ အခက်အခဲကာလတွင် အမေရိကန်ပြည်ထောင်စုက ရိုးသားစွာမျှော်လင့်ပါသည်။ စစ်တပ်အာဏာသိမ်းပြီးချိန်ကစ၍ မြန်မာပြည်သူတို့ တစိုက်မတ်မတ် ပြသလာနေခဲ့သော ရဲရင့်မှုတို့အတွက် မိမိတို့ချီးကျူးပါသည်။ မြန်မာပြည်သူများသည် စစ်အာဏာရှင်၏ ထိတ်လန့်ကြောက်ရွံ့ဖွယ်အကြမ်းဖက်မှုနှင့်ဖိနှိပ်မှုတို့ကိုရင်ဆိုင်၍ ၎င်းတို့၏အသံကို ကမ္ဘာကကြားသိအောင်ဖော်ပြခဲ့ကြသည်။ ဤအခက်အခဲအကြပ်အတည်းကို ကျော်ဖြတ်နိုင်ရေး၊ မြန်မာနိုင်ငံဒီမိုကရေစီလမ်းကြောင်းပေါ်ပြန်လည်ရောက်ရှိရေးနှင့် ရေရှည်တည်တံ့သော ငြိမ်းချမ်းမှုအောင်မြင်ရေးတို့အတွက်ဆောင်ရွက်နေကြသော မြန်မာပြည်သူများအတွက် အမေရိကန်ပြည်ထောင်စုက ဆက်လက်၍ အခိုင်အမာထောက်ခံအားပေးနေမည်ဖြစ်ပါသည်။
ယခုကဲ့သို့အခက်အခဲကာလတွင် မြန်မာပြည်သူအားလုံးအတွက် မိမိတို့၏နွေးထွေးသောမေတ္တာကို အလေးထားပို့သလိုက်ပါသည်။
